Pasublia Kan Balukag Mo

Uyagwak! Uyagwak!
Bayong sa kaba'san
Batad sa mainit
Lugom sa mauran
Anong birtud baga
Inda dai aram

"Pasubli man nguna"
Puti mong balukag
Maski anong init
Maski anong uran
Daing siribugan
Maski anong rarom
Uya sa atubang

Ikurit Mo

ano daw naman kung ikurit mo?
an mga kolor na de numero
sa pagtangad ko maheling liwat
ining budlangaw, hidaw ko hanap

aldaw nagtago dai makua
dalan nasarhan puro tiunay
oh - sa kurit mo tanos an dalan
ining budlangaw an paalawan

Kagayonan Sa Uran

an uran
may dara darang kagayonan
uya an mga dahon na tomtom
sa sarong semanang kusog kan bagrat

Sa Sirangan

An milagro sa sirangan
Sa pagmuklat karangahan
Ano ining kagayonan
Sa tubig panalmingan

Nagpahingalo an dagat
Kinutay an mga lambat
Tuninong na daing sukat
Sa baybayon an paubat

(Nagpaheling man sa guiraray an aldaw...)

Dios Marhay Na Bangui

Dios Marhay na Banggui!

Mantang saro sarong
pigtatamungan ki diklom
an mga awot

Mamamatean 
an lipot kan hoyop hoyop
na minasaro sa mga yamog

Trankilo - 
an mga manok
nagkapagturugdon na
sa saindang mga tatagan

Dai ka na masusuriaw 
nakasulnop na an aldaw
asin ta ini mapapara 

Mga aking paragal pagal
dai na mailakad an mga bitis
mapupulot na an mga mata

Sa oras na ini
pighihidaw an pagiromdom
kan senyal kan pagpoon
kan pagpahingalo asin pasalamat

An bagting kan kampana
sa alas sais
asin an sarong halipot na pangadiye
para sa sarong matuninong
na banggi...

Dios magbalos 
sa sarong aldaw
na naman na natapos!

Marhay Na Aga

Marhay na aga!

Mantang luway luway
na nagkakanap
ang liwanag
sa mga balagon

May tawo na
nagkakanap kanap man
ngani mailaog sa lente
an kaagahon na ini.

Sarong milagro
an maheling 
sa oroaldaw 
an arog kaining 
kagayuonan.

Pasalamat
asin pagomaw
sa mga biyaya 

Salamat sa Diyos!

An Sakong Payag

Malipot Lipot Sa Kaba'san
aga na magbangon
isulot an pandong
magjacket magkulbong
iwas sa si'pon

dai paglingawan
tabak sa habayan
may halas sa dalan
baad mati'makan

magkape ka nguna
ba'go pa maglusad
sa Dyos pasalamat
asin ikuriyat


MARHAY NA MAURANON
ASIN MALIPOT NA AGA
SA GABOS

Paskong Mauran uran sa Payag

Pakatapos kan dai mapandong na uran
An mga makusog na bulos kan tubig
Naheling ko man sa guiraray
An gayon kan kalangitan
MARHAY NA ULTIMONG AGA
KAN TAON!

Saen Kamo Nagpasko - Sa Manila?

Saen Kamo Nagholiday - Sa Manila?

by Taga Tiwi Albay on Wednesday, December 29, 2010 at 9:50pm

Nata daw ta may Eksodus  an mga tawo basta mapasko asin ma New Year?    Maski anong lunadan paranu'an.  Mag eroplano mag aircon bus o ordinaryong lunadan.  Talagang dagsa an tawo.  Gabos an ma'wot makatungtong sa Manila - duman mapasko o ma New Year.    Ano man nanggad na penomenon ini?  Nata ta an tawo pasiriring sa ciudad mantang sa ciudad labi labi ka sibot lalo na an trapiko.    

Ah, maski anong sabihon makaogmang pagmasid masidan an mga familia na puro pasiring sa Manila an ma'wot duman makapagholidays. Iribahan an gabos mas maogma.  Maski nagsuru'suan payt sana.   Makangirhat ugaring an mga aki ni ipigtutuon sa bintana kan bus nagkakabarakingking lalo na kun saradit pa.   Mantang naheheling ko an sibot sibot na kamugtakan sa bus terminal  narumduman ko su primero kong pakatungtong sa Manila.  Maga poco mas y menos sies anyos pa sana ako.

Hale sa Tiwi odto kaming  naglunad  sa dakulaon na awto pasiring sa istasyon kan tren.  Naaraman kong  Camalig palan ito kan nagiristorya su mga kairiba mi bago magbaraba'an  sa bus na kolor  itom.  Dai pa ako kaito tatao magbasa kaya kulang sa detalye ini. .

Sa istasyon ka tren an kairiba ko si Madires, asin su duwa kong nguhod (pito kami pero tolo pa sana kan panahon na ito). Si padires nawalat.  May kairiba man akong apat na pinsan buda su ina man ninda na tugang ni Ma.  Arayyyy.. makulog su payo kong nakatangko kan ako ituon sa bintana kan tren.  Pigtuturuon an mga aki sa bintana bakong bagang sa pintuan pipaaragi ngani tultol - kun medyo dakula na - sus na pasakit!  Nya kun nahuhungkang!   May sarong aki naheling kong itinuon payo an enot na huminugpa sa laog kan tren,   HUnaon mong makalambitay sa bintana ta ituturol ka man sana - bahala ka na sa paglaog.  Paborokod pati an mga tawo paerenotan sa tukawan.  

An siste - nawaltak  su saro kong sapatos na ba'gong bakaon na may duwang pulgada pa an kadakulaan sa bitis bilang abang nganing magamit pang pirang taon segun ki madires (matalino talaga si madires sa barakalan - lubos ako).  Nasibot su Tiyuon ko ta makakaabot daa ako sa Manila na daing saibong na sapatos.  Bakong mahalaga sako kan panahon na ito an sapatos ta sa kulog kan payo na nakatandol an sakong primera menteng gustong paghaya'an.  Alagad pinugulan ko ta tibaad ako iwalat.  An sakong tulak pati nagkakala'kaga na sa gutom.  Poon alas dies kami sa Tiwi ki halat kan awtong itom na lulunadann pasiring sa Camalig - ika aki matagal ka kaan?  Pero tagal pa siempre ta baad madagitan dai makaiba pa Manila. 

Asin ta nag tototot nang halabaon an tren,  Aa sabi ni Ma "taod taod na an karakanan ta tibaad pag matanga magkagurutom bata halawing an biyahe".  Ay - Dios miong pagtios makapaManila sana!  Narumduman ko an patanid kan garing kunduktor - "sadahi sana an saindong bintana ta may udo' na ipigagapo sa tren".  Dali dali kong sinadahan mantang ako nagtatanaw kan mapu'ngaw alagad makolor na pananguron sa bintana.  Sige an purupondo.  May nagtindang tubig, maluto, kape, bunay maski ano kada istasyon magpapagmata ka sa ribok kan mga nagtatarangro' na kakanon.

Napagmata ako,  maliwanag na - iyo daa ito an Tutuban.  Haisst Manila na!  Matawo.  May nagiiwal na duwang bayi.  An sabi ni Madires " hilinga an nguhod mong duwa ta bantayan ko su mga dara dara ta.  Dai pagbayai ta mawara an saen kita kaan mahanap".  Nagkapirang kahon na an laog batag, kamote, mga gulayon buda siempre su mga pasalubong na ibos, latik...

Nakaabot man giraray sa harong kan Tiyuon mi sa Manila.  Pwerte may telebisyon.  Itom buda puti an tawo.  An naromduman ko - patalstals kan Coca Cola si Nora Aunor - an kanta "it's the real thing"....

Duman ko naikonek sa giraray kun nata an mga tawo muyang magpasko sa Manila.  May mga tinalubuan na bado hale sa mga pinsan sa tiyaon.  May mga gading na hinaraboan na kan mga aki sa Manila urugmahon na man kami.  Paerenotan pagsalo.    Dai ugaring ako nakakaiba sa mga ralakwan ta ako an nagbabantay kan tugang kong sadit pa.  Ay - paraaling baya ta matua.  Narumduman kong nagparetrato sa Luneta, sa Manila Zoo buda sa Dapitan,  Sa edad kong sais anyos dai ko pa aram kun nata ta dagsa an mga tawo sa mga lugar na ito.  Dai ako makakahuron sa mga pinsan sa tiyaon ta mga tagalog pipira pa sana an aram kong tagalog arog kan :  "di pa po ako kumakain.  nagugutom na po"... iyan pa sana an tagalog ko. 

Kamo ano an eksperiensiya kan primerong paManila?  Siguradong maogma lalo na kun Disyembre...

Alagad kun kamo tabi mga magurang dai na ipagturol an mga aki sa bintana ta baad mahultok.....

Buda mas marhay gayud atab ataban an paManila ngani dai makasabay sa suru'suan.  Iyo man sana.

Krismas Kan Sakong Mga Ataman

Pasko kan sakong mga ataman
Hababawon sanang kaogmahan
Kantidad  sana sarong toblerone
Helinga na daw ta ngururison


Kamo ano an halaga kan pasko saindo?

An Pasko Sa Mga Aki

Nagkapirang aldaw na sana
Pirang turog an pagiromdom
Aldaw na kan mga aki

An nagpaenot digdi
Si Kristo kan ipinangaki
Saiyang boses enot nadangog
Sa abang sabsaban naghibi

Mga aki saindo an pasko
May mga ba'gong bado
May mahamot na mansanas
May mga kwarta
May kaogmahan sa plaza

Kamong bako nang mga aki
Ano na an saindong pasko?

Maganang Pasko

An satong kakanon
Pwedeng bakalon
An gana pagkakan
Dai nin tindahan

Maogma An Pasko?

Nakakarunot nin puso
Nakakarungkab nin daghan
An retratong abang nakuahan

Siisay baga an dai makamati
na kun an saimong 
namomo'tan hayukong an pisi?

Alagad -
Dai sinda ipagbasang basang
Sinda mga paladan
Sa pigsasabing kamatean
Sinda daing kasa'lan
Sa lawas o sa isip man

Kita man sanang so boot 
toltol an kaisipan
AN nag-iisip na may
kabaldean
Sa saindang kamugtakan

Ano daw an saindang
pangsabat na tataramon?
Sa makolor na ining panahon
Bako daw na arog k ini
an saindang kahaputan -

Nata - maogma man nanggad an Pask0?
Kindle 3G Wireless Reading Device, Free 3G + Wi-Fi, 3G Works Globally, Graphite, 6" Display with New E Ink Pearl Technology

Si Hesukristong Taga Tiwi Albay

Si Hesukristong Taga Tiwi Albay

Kun si Hesukristong Kagurangnan
Sa Tiwi Albay iminundag
An kamugtakan na ini
an mapalad

Saiyang pipilion
Buhay nin kapakumbaban
Sa tahaw kan kaba'san

An saiyang kamagurangan
Mga paradugi asin paratanom
An pagkamoot sa daga' hararom

HAEN NA?

Haen na, haen na
Haen na su salagan?
Haen na su mga aringgawan?
Haen na su mga dahon?
Tinalbong na sa pananguron

Haen na haen na?
Nata ta an aldaw tuminago?
An uranon mahi'bugon?
Saen kita masirirong?
Arog kaining malipot an panahon?

Haen na haen na?
Si kapitanang uwak
Luminayog tuminuwad
Daing bagang purupaisi 
Nag-istar na sa ciudad!

An Bagting Kan Kampana

An Bagting Kan Kampana

by Taga Tiwi Albay on Saturday, December 18, 2010 at 9:58pm

Sa pula kan magagahon palabaw sa  pananguron

Tinugkad an kadagatan abot mga  kaislahan

Langkaw nin  kabubuldan hiwas nin kapatagan

Abot abot sa banwaan kadakul na pangapudan

Mantang digdi sa banwaan satuya nang nahimate'

An makawiling pagbagting nakakaengganyong tanog

Na sa kaskas kan panahon  nagpaparomdom sa tingog

An Diyos sato minasadul satuyang  ibalangibog

Sa pagkaskas kan panahon piglamag kan mga aki

Nabirik na an kina'ban mauubos nang mawilii

Mga ba'gong imbensiyon maski gurang  nagkanarali'

Sa sarong bagting man lugod may matada pa dai mahuri

May saro may duwa asin maylima naging sampulo

Kun pira dai maukdan naghurunglon sa paghimo'

Nagsararo' nagtarabang mapadara sa banwaan

Regalo ninda sa banwang  pinadaba ginikanan

Dating gawi sa orasyon  alas sais nasa calle

Magbabagting  an kampana pagpagiromdom sa pag-agi

Sarong aldaw an malipas tapos na  magpasalamat

Magdidiklom an palibot magpopoon na an banguii

Sa pagkanap kan liwanag sa pagmuklat an sirangan

Pamilya amay na aga namarahaw harampang

Nadangog na an kampana guiraray magpasalamat

Sarong bagong aldaw kita buhay pa paladan

Uya pa kami O Diyos ko, pagromdom saimo guikan

Mga maogmang okasyon  pagsararo karasalan

Pag-ako kan sacramento sa pagkugos burunyagan

Sa Yukarestiya yaon Dorodominggong kaaldawan

Madadangog magpapagring an bagting taros sa laman

May sadiri man na tanog  para sa kulog kan boot

Para sa  nagmumurundo sa huring pagsuruwayan

Nakukubhanan an boot sa plergariyang may kudot

Alagad  igwang pag-aling  sa pagmondo magigianan

Saindo mga paladan - Mga Taga Tiwing tunay

Mga nangibang banwaan alagad dai nakalingaw

Mga naghunglon nagtabang  - saindo Dios an Magbantay

An bendisyon sa saindo asin padaba sa buhay!

Asin ta kita magontok dangugon Saiyang Tingog

"Tawani Akong minuto diit man sanang oras mo

Saindo mga paladan labi labing kaogmahan

Ako nagpapagiromdom - Madya! Uya! Yaon Ako!  " 

rawit dawit para sa nagdonar kan digital chime sa simbahan kan Tiwi

dakulang kaogmahan an madangog an tanog kan pangapudan asin

pagpagiromdom kan satong pagdukut sa satong Kaglalang

mga paladan kamo - An Dios Magbalos para sa saindo asin sa saindong familia!

Many Happy Returns...

Looking forward to seeing you again
Welcome to the arms in waiting
When I hear your laughter in the rain
And smile to me make the bells ring

To see you again for a little while
Sleep in my arms and then leave a sigh
Then off you go to the portals of life
And carry on the wisdom of the old

-----------------

Welcome home again my Alyssa - she is coming home tomorrow leaving manila tonight for a weekend  :-)

Nagpapara-parang liwanag

Nagpipinaw pinaw nagpapara'para'
Nagpupurupalsok nagwawara'wara
Sa kairaruman kan bangguing mapungaw
An boot kong mundo' gustong magkurahaw

Bitis nakagakot dai makalakaw
Nganing makatukod sa si'mong kakundian
Sa entonces baga magdiklom  mapalsok
Luwasan an tingog paomay sa boot


----------------------------------

kan aki pa ako - sa atubang mi (hanggang sa ngunyan) mahiwas na kaba'san. igwa duman na mga payag - kami man kada aranihan nagpapayag ta nagpipisar na paroy an mga magurang ko. sa pagkabanggui napupungaw akong mata'naw an nagpipinaw pina...w na ilaw kan karaba sa tahaw kan kaba'san. yaon duman an kakawat kong si Ker na taga San Bernardo, Tiwi, Albay na ngunyan paratindang banig :-) - kan panahon na ito dai pang kuryente - an isip ko mag-aga na tanganing magkarawat na naman - sa ngunyan pagnagbiyahe ako pa manila na nakasakay sa bus namamate' ko an siring na kapu'ngawan pag nakakaheling akong harayong harong sa tahaw kan kaba'san. sa isip ko pa kaito - pa'no kun magkulog an tulak pa'no siya makahagad na ayuda :-) ...

dagat nin diyamante

dagat nin mga diyamante

sima'a na ining mga kayamanan
magpadagos kita hiruon an sagwan
puntahon an tahaw tanoson an katig
dapat ibalanse dai magtagilid

diit na oras pa pag-abot sa tahaw
toy mangalagkalag asin magsurihaw
sobrang kaogmahan panoon an daghan
gabuton an kulog ilobong sa lawod

ta kun maoyam na birikon an katig
magluwayluway na magsagwan pagilid
darang kayamanan sarong kamalig
maguli na nguna maghingalong hipid

Add a caption

dagat nin mga diyamante sima'a na ining mga kayamanan magpadagos kita hiruon an sagwan puntahon an tahaw tanoson an katig dapat ibalanse dai magtagilid diit na oras pa pag-abot sa tahaw toy mangalagkalag asin magsurihaw sobrang kaogmahan panoon an daghan gabuton an kulog ilobong sa lawod ta kun maoyam na birikon an katig magluwayluway na magsagwan pagilid darang kayamanan sarong kamalig maguli na nguna maghingalong hipid

Saro Duwa Tolo

Saro duwa tolo
Sinisi'pon ako
Tolo apat lima
Sa panyo magsipnga
Anom pito walo
Kulog na kan payo
Hrsst ...siyam sampulo
Baad magtaragdo


HRSSSSTT....BADADO DANG BARHAY!



sado duwa dulo
sidisipod ago

 dolo apad liba

Sa padyo bagsipga
Adum pido wado
Kudog da kad payo

Hssst...diyab dampudo

Baad magtaragdo

Plea of The Firefly

let me light you

let me guide you

let me lead you

...if you want to

let me fly high

let me fly low

let me linger

please consider

please let me be

please let me stay

please let me shine

please please be mine