Taga Tiwi Albay: October 2010

Monday, October 25, 2010

An Historia Kan Payong

Taga Tiwi Albay October 24 at 11:18am

PAYONG

Oh!
Payong kong padangat
Ika sako nang sinaray
Sa baul asin inalamag
Boot kong ilobong
Alagad sayang kan mga
giromdom

An historia de un amor
Nagpoon sa payong
Sa pagsuno' napu'nan
An historiang halipot
Sa sarong pagpirok
sa inosenteng buhay
tulos tulos
natapos

Tinalbo na an payong
Nagkaruloslos haloy
nang sinaray
Sarong aldaw dai
pigtuyo
An kasuno' boot
natamu'rakan

An sabi kan mga
nakagugurang
Kun mahiling mong
magda'lom
Magdara ka nang
pamandong

Masiram isipon
Balikan an padaba
na payong
Alagad may mga
obligacion
Habo kong madigtaan
Sakong mga balor (values)
asin paninindugan

Habo kong maging
arog sa pariseo
Naghahatol alagad
dai man pigigibo

O payong ko
umulmong ka na
Sa baul kan sakong
mga memorya
Yaon ika ranga.

Monday, October 18, 2010

Domingong Makaurag

Pakatapos mabasa an email ni Gigie na kaipuhan ko an background kan kaba'san para sa photoshoot kan CHristmas Card, nagpoon akong mag-isip kun pa'no ko guibohon su storyline. Ahhh...magtios ka ta gusto mong maging popular. Sige pa...trabaho pa...iyan an paagi ngani mata'wan kang honra para sa saimong arte.

Paka-upload ko kan mga retrato kan hapon na kinua sa higod, kinahuron ko si Madeng Eden na kaipuhan kong mag-retake pagka-aga. Saiyang suhestioyon ang imbitaran an mga aki sa saindang pagtaraning. Nag-uyon ako na alas-sais mapoon kami.

Siempre nagkutkot ako sa baul kan mga kaipuhan ko - weeezz - kornihon na an lola mo.............ah, ibang istorya na ito.

Turugon pa ako nin huli ta Domingo kan pukawa ako kan sakong esposo na yaon na si Made buda su mga aki. AY, magmata, magbangon ta magtrabaho...Nagmumulat mulat pa - dagos madi ta mahanda na ako.

Tina'naw ko an payag na samong dudumanan. Harayuon na marhay. Asin ta kaipuhan ming maglakaw hale sa bulangan. Bitbit su mga props naglakaw kaming gari nang mga inda. Duwang bag, may camera sa liog, buda may parol.

Madugi an pasiring sa ilawod pero maogmang ming linakaw kan mga aki asin nagkapirang magurang. Ta nagayunan ako kan Mt. Malinao nagakto akong magretrato - lintian! "there is no memory card". Hay, gari akong madismayo. Luway luway ako - nagbaklay giraray pabultada hale sa sakong kinamumugtakan. Lintian ta rilingaw na...kan sukat!

Asin ta nakaabot na giraray ako sa samong destinasyon matapos na umuli giraray.

Uya an nagkapirang retrato na sakong nakua alagad bako akong kontentado....

Kulog Kan Payo

Ano nang angog ko ini!
Ano nang dungo ko ini
Ano nang payo ko ini!

Makulog an payo
Garing pig martilyo an sentido
(matubo na gayud su sungay)
Barado an dungo
Nagluluha an mata
An apod kaini?
Rhinitis daa inda...si'pon
an kaipuhan sipnga

Kan sukat kan kaduratan
Nagkalkal kan mga pigaalamag
nang mga papeles

Haisst, ano daw suruluan ko na ini?
Dai na man baga nababasa?
Mga basura na man sana
Ha?

Bai daw
Sayang
Bayae sana an
Kun alamagon an
Kun sibaon kan anay
Iyan...

Sipon y sipnga
Gari nang ngongo...

Saturday, October 16, 2010

I Braved the Dust

For sentimental reason
   known only to me
   I braved the dust

There in the dark corner
  Stood old grandmother's chest
all cobwebs and dust
   all mementos and memories
   longed and remembered

I took out a blue ribboned stuff
  now almost three decades past
I browsed through each carefully
  Found a special space for old
   papers, wrappers and notes

As I froze and let the memories
   take me to my little chamber
There I stood, I remember my youth
my sweet, naivete, first romance
   with my special friend

I set aside the dust from an old schoolpaper
   and blow amidst my sneezes and blows
Carefully I found an old piece I have written
   There my heart in that point in time

Oh where is the past the long walks
   the stride from home to school a nd back
The weather we carelessly break through
   be it a hard rain and be soaked in the mud
Or a scorching heat of the noon sun
   While passing vehicles whip us with
   thick dust of the earth

But reality I wonder why
Like any theater play
   the curtain called
Like any song it has its refrain
   but at a certain time it has to end

I have many questions but I never ask
I could have my ways but I never complain
To comfort my nights I just keep this in my head
That some people are better off as friends than lovers
Wrote that in my head and be content

Aaachuuuuuuuu!!
Amidst sneezes and blows
  my nose now red from rhinitis
REALITY bit me
My youth has gone
   and I am getting old
I have my own life my family for my reality
   I only have you for my memory

Listen Friend

(from an old old journal - Year 1981 September
VCHS mga pigaalamag nang poem kan hi school
nakutkutan sa baul    para kisiisay daw ini, lingaw
ko na, kun siisay ka man - kung haen ka man,
sabi ni pokwang, diyan ka na lang :-) )

Listen friend,
I've got a secret to tell
Did you know that I keep thinking of you?

Of the things you said to me
And all the topics we use to disagree

The fun and joy of walks under scorching sun
Every step we make
    from home to school and back
Each step becomes
   a beautiful dance

And all about
the hundred small and ordinary things
   that happen each day
This foolish heart meant they
    so special to me

But why?
I keep myself asking
This mind boggling question
   eversince
Why is it that I am afraid to face the truth
    that you have a special place in my heart?

Knowing this
I hope you won't change
Coz'
I like your gentle ways
I like your playful eyes
i like your cheery smiles
In fact I like every part of you
And it will hurt me to lose you
Even as a FRIEND..

Friday, October 15, 2010

Aldaw Nin Sabado

MARHAY NA AGANG SABADO...
Hale sa magayon na langit
kan Tiwi, ALbay.....

Aldaw nin Sabado
Aldaw nin pagdeskanso
Aldaw nin paglinig
Aldaw nin pag-asikaso

Aldaw nin Sabado
Aldaw nin pagsaod
Aldaw na maguruli an mga aki
Aldaw nin familia

Aldaw nin Sabado
Aldaw kan mga ama
Aldaw nin labada
Aldaw nin pamlantsa

Aldaw nin Sabado
Aldaw nin pagpamanikyur
Aldaw nin paghinguto
Aldaw pagpahale kan uban

Aldaw nin Sabado
Aldaw nin pagtumar tumar
Aldaw ni San Miguel
Aldaw ni Granma (Grand Matador)

Aldaw nin Sabado
Aldaw nin pagtaong
pasalamat
Sa nakaaging semana.

Sabado
Ano an gibo mo?

Si Junior Nag Dor To Dor

Si Junior Nag Dor To Dor - (Mga Realidad Kan Buhay Sa Tiwi)

by Taga Tiwi Albay on Tuesday, October 5, 2010 at 7:32pm

"Ma’am, dor to dor, pacomplex”. Sige an gasod mantang nagpapaypay sako an lalaking nakamotor sa ibong kan tinampo.     Sa halangkaw na boses an dagdag na sinabi “subago pa tabi ma’am su saimong shuttle. Late ka na – mari na - dor to dor. Derechong complex ini. Kita sanang duwa. “. Aw nom ta kami sana daang duwa, hala ta makupo ako saiya sa motor? Haha.., magalang man an para dor to dor pero su sugpon niyang kami sanang duwa, nagiulok ako. Dangan sinirip ko an sakong celpon, alas siete na an aga matatardi man nanggad ako.

Dai man ako nagsimbag kun ako malunad alagad luminiko asin pinatunong an saiyang motor sa atubangan ko. Habang nagaandar an motor, itinukod an saiyang bitis nagsabi giraray - “Ano mam, dai nang serbis na maagi, mana, beinte pesos dor to dor hanggang complex”. Sa boot ko, “may anting gayud ini ta nag-uukud na dai nang maaging serbis”.

Hinale su helmet niyang model kan tiempo Hapon saka ko nabistuhan. “Aysus Junior, huna ko siisay nang para dor to dor? Ba’guhon baga ining motor mo. Nata man ta nagba’go ka nang trabaho?. Di dai ka na nagkakaba’san ngunyan? Dai ka na kaan madudugian? Tapos dai ka na nagsisikad sikad? Gari nakatama ka sa lotto?”

“Dai man mam, hulugan baga ini. Barato na, an bulan bulan ko digdi wan it (Php1,800).   Mapagalon man kaya magsikadsikad, pag iabutan kan uran magkatirindi an mga ugat ko magkatoroog ako. Buda bata baga nagdadarakula na an mga aki, kaipuhan tang magkayod na dakul dakul.

“Kun dai ka na nagkakaba’san, malingawan mo kaan an pagsangat.” Intrimis ko ki Junior mantang pigtatanaw ko kun igwang umaging lunadan. Hiyum hiyom sana an isinimbag sako.

“O ano, sangkay na tabi mam, ta malate ka.” “Ay Junior, takot ako sa motor magsu’nod. Masikadsikad na sana ako. Kuaha su sikad sikad mo ta duman ako malunad. Bako digdi. Nata kasuarin ka nakaukod magmotor?”

“Aw pasilon man sana ini. Mala kinua kong Lunes na aga ining motor. Hapon nagadal ako magpadalagan. Sa hapon sanang ito nagkayod na ako. O ano, ngunyan Miyerkules patolong aldaw na. Mari na mam maski ilibre taka”.

Ahaha, nom ta ililibre na ako. “Aw Junior hare ako pagbinsira. Kuaha su sikad sikad mo. -   O huni na, nagiilaw ilaw, may serbis na ako – salamat na sana.. “

Bago pa puminundo an lulunadan kong serbis, nagaktong magpaandar na man si Junior. Asin ta an hudyan kong hapot ,
  “Ano Junior may lisensiya ka”?

Hiniling baga sana ako sabay ulok dangan pinadalagan an saiyang motor na nakkikildab pa an tambutso.

Ano daw?

An dor to dor (door to door) iyo an paglunad sa motorsiklo maski saen an saimong dumanan. Pwedeng pa Nagas, pa San Bernardo, pa Sto. Cristo o pa Legaspi... An problema ugariing kainidai ka nakakasiguro kun may lisensiya an mga driver. Asin ta kun ini minapadaralagan, huna mo

makulugon na an tulak kaipuhan nang magbawas...sa madaling sabi kaskason.

Habo kitang makiaram sa mga paghanapbuhay ninda alagad kita gabos na nagtitindog sa tinampo kairiba an satong mga aki nakakaag sa peligro.

Sa Sakong Daghan

Digdi Sa Daghan ko…
(Welcome HOme my Pretty Little Girl)

Maogmang paguli aki ko
Uni an gabos saimong paborito
Sakong hinanda para sana saimo

Kusidong sira may buntog na ugbos kamote
Gulay na kalunggay may rinunot na page
Luway luway ugaring difisil kun madugi

Prinitos na talima’go o kaya bulinaw
Sapaon namitan maragsip masiram
Magpiris na suwa ikaag sa silver swan

Tableyang tsokolate nagkakala'kaga sa takuri
Nag-aalusuos sa mainit na tasa kan kape
Hayupon nin marhay tibaad madalsuan an ngiwi

Nagsapna na akong tres kolores na kamote
Ayy…habo mo nanggad an kamoteng potee’
Mapakudkod kitang lukadon pampalaman
Pinasakat ko na su mga niyog sa late’

Sarong bulig na batag na kalibo
Pinapataba’ ko na pinabakid ki Terio
Magsinapot si Manay asin mahamis na bananacue

Su pili sa higod tinukdol asin pinatilad na
Pagkadulsi selyuhan ikaag na marhay sa garapa
Para sa dila mong gari nang pinaglihi sa tanga

Su paborito mong tamong
Bagong laba sa pamilyar na parong
Nakaluwas na para sa saimong pagpaimbong

Su tsinelas mong de burak
Kinuskosan pinamara
Sindang padis man naghahalat na

Ahhh….maogmang paguli
Magpahingalo digdi sa daghan ko

Letting Go

Kaaldawan Kan Mga Mama

Rumdomon an tawong nag tao satong hinangos
An tawong nagdara sato nin siyam na bulan
An nagpuka kan kita naghehelang
Mina hibe kun kita nakukulugan

Rumdomon asin rangahon
Mga babayeng nobleng minatindog
Pamilya pirit na tinitipon
Sa gabos na mga tentasyon

Rumdumon asin pasalamatan
Magayon na babayeng satong paelehan
Maski nuarin kita saiya dumulok
Pirmi handang magpahid kan satong pandok

Mama, mamay, ma, nanay, mommy, madires
Maski ako pa an apod ta saiya
Mahamis an sa saiyang pagdangog
Ipaabot an satong pagkamoot

Ta kung sinda mawara
Asin ta dai mo nasabi asin naipaabot
Na ika namomoot minadulok
Mauuyam ka sa nasayang na pagkamoot

PARA SA KA ALDAWAN KAN MGA INA
HAPPY MOTHER'S DAY TO ALL!

God Is Great!

God is great!
I asked for a bread
He added some spread

God is great!
I asked for guidance
He took me by his hand.

God is great!
I asked to be blessed
He blessed and showered me with graces.

God is great!
I asked for a child
He gave me children to inspire.

God is great!
I asked for a partner
He gave me a husband to share my life with.

God is great!
Great indeed...
I cannot fathom His wisdom
His love, his mercy.
His works surprises...comes in many forms
He gives it when you least expect it.
GOD IS GREAT!

Sa Manipa

by Taga Tiwi Albay on Saturday, July 17, 2010 at 8:30am

psssst.........oissssttttt

masaen ka?

mari digdi
magdangog

dai mo kaipuhan magdayo
dai mo kaipuhan mag'rayo
kun an hanap magayon na tanawon
lakaw asin duman sa manipa
sa gayon ika mapapahanga

manipa with a good view of mt. malinao.

pwede ka magswimming
mag lamutaw sa tubig
magpapresko
sa baybayon asin
magjogging jogging

maglunad sa sibidsibid
magpoon sa balinad
magside strip sa kurangon
an pghingalo ubos uboson

magpainit kan mga bitis
mga rayuma mabulong
magbatad batad
magpaparos paros
mga pisngi papulahon

magpana ning sira
makipagbukodan
maghupol nin hanit
magpuknit na rungoy
magtukdol na bunga kan nipa
masiram ining kakanon

aga sa manipa kun hunas.

ugaring,

sarong patanid
sakong itatao

sa manipa
kun kamo magduman
mag ingat sanang marhay
magluway luway

buraraton an mga mata
maglisto
magmaan na marhay

ta kun ika durudimalas
digdi may ibang klaseg tunok
dai man ika malulugad
alagad ika mariribok.

kuskos digdi
kuskos duman
hugas, kuskos, asin hugas pa
sa bata, ika magmumuda

pwede man ika gumasod
alagad
sa parong ika ruruluyhahon
kun dai ka pa namamahaw
dai ka makakakan sa maghapon.

maglamutaw sa manipa...

mga tawo
mga maboot na taga manipa
ini saindong padangaton,
pangatamanan
hari pagbaglaon

saro ining regalo
pwedeng mawara

ta kun ini bawion na asin mawara
dai kamong ibang babasulon
mga nagpabaya
pa matunaw an manipa

may oras pa
pwede pa
palinigon ta
satuya ini!
mga taga tiwi -

mos na,

sa manipa
baybay, tiwi, albay

Sa Manipa

by Taga Tiwi Albay on Saturday, July 17, 2010 at 8:30am

psssst.........oissssttttt

masaen ka?

mari digdi
magdangog

dai mo kaipuhan magdayo
dai mo kaipuhan mag'rayo
kun an hanap magayon na tanawon
lakaw asin duman sa manipa
sa gayon ika mapapahanga

manipa with a good view of mt. malinao.

aga sa manipa kun hunas.

maglamutaw sa manipa...

Tsinelas

by Taga Tiwi Albay on Thursday, July 22, 2010 at 3:11pm

TSINELAS

Napatud sakong pantrankong tsinelas
Tatak man kunta na kaito Havaianas
Ako nagsasakit, nagmumundo, naghihinayang
Kwartang ibinakal dai napakinabangan

Makasupog, makulog an naging insidente
Sa tahaw kan matawo sa saodan pati
An huna ko nanggad mukobuko ko nabari
Mga tawo nagurulok , may naherak, ako nagdalidali

Aruuuuuuuuyy! Makulog, makasupog an mabaliko :-0
Habo ko na, dai na, waaaaaaaaaaaaaaaaaa (nag emo si manay mo)
Makantidad na ismagol* huuuu, sayang ka
Sa Spartan guiraray ako mabwelta,

Iyan ta kan sukat para tsinelas mananribo
An paghuna man kaya gumayon pa man kaito
Uso baga siempre, magsunod-sunod lamang
An sabi ni sister
"Uso uso na kaya, mahidap ka pa diyan"

An bitis ko napiripit kaipuhan ipahilot
Sa ki Tio Fausto magduman sa San Carlos
Kan sukat magtsurutsinelas dai man bagay
Hala magdusa asin magbagong buhay.
(Sala, magbagong tsinelas)

napatud na tsinelas, kua kanNikon P100 (maorag)

*ismagol - sa Masbate an tsinelas an apod ismagol, eu?

Nag eemo si Manay Mo, buda nagpraktis kan Nikon P100 ni Benito
an subject, "tsinelas"

H2O

H2O -

by Taga Tiwi Albay on Saturday, July 24, 2010 at 10:03pm

Pagmata pagkaaga
Maglimogmog magsepilyo
An kaipuhan mo,
TUBIG

Haleon an muta asin an puto
Magwisik wisik , maglabar
Ano an gagamiton?
TUBIG

patubig sa amarillo

Magpainit kan ginhawa
magkape mag tsa
Magpakalakagang
TUBIG

Bago magtrabaho- mageskwela
Magpapresko maglinig
Mangarigos sa
TUBIG

Mamahaw magisnak
Kaipuhan magluto
Siempre magamit na
TUBIG

Helang maiiwasan
Magsabon kan kamot
Pirming maghugas sa
TUBIG

Personal na serbisyo
Maglinig pagkatapos
Maghugas gamit an tabo asin
TUBIG

Nagkukurahaw
Nagkikimaherak
Mga tanom nagruluyos
An kaipuhan nang marhay an
TUBIG

Su karabaw
Sa tahaw kan uma
Napopongaw sa dugi
Pighihidaw an
TUBIG

An TV
Sa aga sa hapon
Dai nang ibang bareta
Kundi kakulangan sa
TUBIG

Sa dyaryo
Sa Uroaldaw
An nakabandera
Problemang kakulangan sa
TUBIG

Mara na gayud an daga?
Hubas na an mga burabod?
Nata ta diit na sana an
TUBIG?

Salud kan balde
Magpuka sa banggi
Haloy nang nagtitios
Haloy nang daing laog an hossssssssss (ano an hose sa bicol?)
Kaheraki man pabulusa na nindo an
TUBIG

Alagad mga tugang

Maghalat an gabos
Kun umabot an tig-uranan
Baad naman lugod pahinggusto na an
TUBIG

Maghanda sa katibaadan
sa destrosong hatod satuya
Sa tag'uran sumobra na
asin maging baha an
TUBIG

Su mga nakapagadal
Asin mga gurangan
Abiso durodoble uroaldaw
Mangataman kan kahoy
Nganing dai magmara an pighahalean kan
TUBIG

An sabi sa eskwela
An simbolo kan tubig
H2O
An Duwang Hydrogen
Sa sarong Oxygen
Pinagsaro asin ini nagiging
TUBIG

TUBIG TABI!
Nagsabon ako, nawara su tubig
Dios mio dai maimuklat
pikit an mga mata ko
Darahi daw tabi
maski lamang saro sanang tabong
TUBIG!

kabasan with a good view of mt. malinao

Daraga Sa Sinimbahanan

Daraga sa Sinimbahanan

by Taga Tiwi Albay on Wednesday, August 4, 2010 at 10:05am

Tabi horop horopa ngani man
Magayon na daraga sa may sinimbahanan

Na kun ini saro saro nang magkatarakdag
Magkaruluyos asin maging ati sa natad
O burak na magayon asin mapalad
Saimong hamis asin hamot gabos malipas
Masasayang mawawara an kantidad

Asin ta kun talagang maglipas na
Sinimbahanan magmumundo
asin magpupuka

Kaya an hulit kan lola mo:
Mantang
May gayon pa na daing kapadis
An mga hiyom hiyom pa mahahamis
An Oras dai na pagparasayangon
Magdecidir magdali- dali tulos- tulos
Hala manaraysaray na - asin mamatos patos

Daraga sa sinimbahanan, MAGULI NA!!

----------------------------------------------------------------------

An Simbag Kan Daraga Sa Sinimbahanan

O maugayun na amiga tadaw ta namumundo ka
Pungaw paghandal sa boot mo halea
Ang aki kan tiwi naparayo man ngani sa ginikanan nya
Alagad ang pagranga pirming nasa isip nya
Kung mahunas ang salog magtarag ang dahon
...Aram na pirmi na tapos na ang paglaum
Kun siring sakong amiga mawot kong gayo saro sana
Ang maiabot saimo ang size 8 na nakapatos na:-)

Boss Boy Magdangog Ka

by Taga Tiwi Albay on Wednesday, August 4, 2010 at 6:14pm

Dai ko aram kung ako naoogma
Kang naaraman kong dinakup ka
An pandok mo dai maipinta
Ano daw kun namamasol ka?

an retratong ini iniscan, hale sa Philippine Daily Inquier (salamat kay Cookie)

Pira kaming mga naloko mo?
Sa gasto nagtipid, tiniwala saimo
Kami mangmang dinaya mo
Pano, kiisay kami mareklamo?

Boss Boy magdangog ka
Pinagalan mi nagpasiram ka
Naging simo poder, yaman asin ranga
Musta man an saimong konsensiya?

Ta kun kami gabos na dinaya mo
Magkurudot saro saro saimo
Pagbalos baya ngaya an hulit
Dila mo sana gayud an daing palnit!

Piyesta Na! Piyesta Na Sa Banwa!

PIYESTA Na! PIYESTA sa BanWA!

by Taga Tiwi Albay on Sunday, August 8, 2010 at 10:10pm

Maogma an mga paratindang koron
Sainda ining pighahalat sa bilog na taon
Iluwas na an, magtirinda sa centro
Dakulon an dayo, magaramay kamo
Piyesta na!

Maribok ribok an banggi sa saod
Kiino kino, pula puti, may pa bingo
Ferris wheel, dakul an kawat tarayaan
Mari, magtaya ngani mapierde man
Piyesta na!

Sa saodan mga parada gurubot
Paninda kadakuldakul palibot
Suru'suon an mga tawo siribot
An Patanid: MagIngat sa mandurukot
Piyesta Na!

Hay, ano na baga ining mga aki
Aga udto sige na sana an praktis
Segurado ini sa parada pagabot kan Lunes
Lawas maitomon pisngi gari hagis
Piyesta na!

Mapa nobena kamo man tabi manay?
Tolong dekadang rosaryo saindo noy?
Saindo tabi lana, nakakabulong tabi tiya
Huni man, sabayan po nindng kandila
Piyesta Na!

Magayon na daraga digdi sa Tiwi
Gayon, dunong, ugali asin an tindog
Saindang ipapaheling magagayon mabini
Dakulang tandan sa masuwerteng mapili
Piyesta Na!

Marulugsot kaming mga nasa bulod
Samong hehemateon saindong tugtog
Patanid:
Ingat ugaring sa saindong paglunad
"Dor to dor" magingat tibaad mapadad
Lugsot na, Piyesta Na!

Ilatag an banig na gibong Bagumbayan
An basket gibo sa Coro-coro siring man
Pansit hale sa lato satong tanaan
Cassava cake ni Tio Munding na taga Carayan
Piyesta Na!

Sakaton na an mga niyog sa natad
Magibos, magsuman, latik na may lipstik
An araki pa saro sarong ihulog
Magbuko salad gabos hale sa niyog

Pirang mga urig an maugik ngunyan?
Nganing maestimar halat na bisita
Maghirilingan an dakulang pamilya
Si Tio, si Tia, si Manay, si prima,
Nagpirit umiba an first love ni Lola
Piyesta Na!

Alagad sa piyesta an importante
Segun sa hulit kancatolikong relihiyon
Magsimba asin satuyang giromdomon
San Lorenzo Deacono na satong patron
Piyesta Na!

Sa Paagi Kan Lente

by Taga Tiwi Albay on Wednesday, August 11, 2010 at 7:36pm

may mga bagay na dai kayang sabuton o tawan na pagomaw
kun an gagamiton sana an satong mga mata

ini an mga bagay na parauso sa satuyang pagheling
ta ini pwedeng uroaldaw nyatong natutuparan
o kaya pirming nasa satong atubang

sa dunong kan tawo ginamit an siyensiya asin inapod
na teknolohiya

an mga bagay na satong napapasipara
natawan ninbuhay asin
nagkaigwang magayon na presentasyon
sa paagi kan lente

An Salming Asin Ako

by Taga Tiwi Albay on Friday, August 13, 2010 at 9:50pm

An Salming Asin Ako

May mga panahon na
Matanaw ko sana an salming
Ako ginigirabuhan

May mga oras na
Nahuhurop hurop ko
Haloy na nakaaging aldaw
An sabi kan padangat kong ina
"Kun dai ka makahale diyan
ikulintas na sana an salming na an"

Ta kun ako minadungaw
Sa salming na malinaw
Hinihidaw ko an sabi sa makusog na tingog
Kan tawo sa sakong atubang
"Wow, ika man nanggad an?"

Uminagi an halawig na panahon
An salming asin ako
nagkamunduan...

Habo ko siyang hampangon
Dai kaming marhay na boot
Salming na sakong dinakulaan

Alagad hararom an samong relasyon
Maski dai nagtitinuhan
Didamayan niya ako
Kadamay ko siya
Asin an bago kong amiga na
PLANTSA.

(excerpt sa sakuyang Personal Journal - Struggles kan Sarong Babaye na Kurong An Bangs- as she metamorphose f

Mga Giyera Sa Buhay

Mga Giyera sa Buhay...

by Taga Tiwi Albay on Saturday, August 21, 2010 at 9:43am

Mga personal na balakid asin pakikipaglaban....

Iklik an retrato nganui dumarakula an letra

Saro pang klik nganing mas dumakula...

Diklom

by Taga Tiwi Albay on Thursday, August 26, 2010 at 9:25pm

Dai magmondo
Kun magdiklom an banggui
May ilaw na magliliwanag

Dai magmundo
Kun magsulnop an aldaw
Yaon an bulan sa saimong pamayuhan

Dai magmundo
Kun dai magpaheling an bulan
Yaon an mga bitoon sinda gabos magkikinang

Dai magmundo
Kun sinda gabos daing bangraw
Ipiyong an mga mata asin mangiturugan kan liwanag.

Asin Ta Dangoga Man

by Taga Tiwi Albay on Wednesday, August 25, 2010 at 10:49pm

Sa diit na pagbasa
Dai pagisipon na
Nasa satuya nang gabos
ang tamang ideya

Sa diit niyatong pagkasabot
Dai ipagpamati sa kapwa
Na sinda mga mangmang asin daing inadalan

Magdangog man maski bakong sa gabos na oras

Ta maski an mga mangmang asin an mga pula
Sinda man igwang magayon na istorya

Tagay Para Sa Saimong Liberasyon

by Taga Tiwi Albay on Saturday, August 28, 2010 at 10:04pm

Daing gayo ipagogma
An saimong aldaw nin liberasyon

Romdomon
Na igwang mga gira
          an saimong dating harong

Na maski sinda minauyon sa saimo
Dai nasimot an saindang pagkamoot
Asin gurano man karaot
  an saindang mga inagihan
May valor pa man guiraray an saindang
       sadiring laman

Susoga amiga ko an leksiyon nin
   kapakumbabaan
Asin ta saimong pakaromdomon
DAI NING NANGGANA

Alagad ako naoogma para sa saimo
Tagay!
Sa saimong liberasyon
Sa saimong katrangkilohan...

Gading-gading, Ayam-ayam, Badil-badil

ASIN INI PAG NAHULOG MINADAKULON

repost sa kahagadan kan nagkapirang mga kabisyo

An manyika na de colores an apod GADING GADING
May lipistik may burak an talinga gari daraga
Ugaring an kamot kaini dukot sa kagiriran
Ngunyan asin kaito ini siring sa dati durukutan.

Nakasabit an itom na kawatan apod BADIL BADIL
Dai timing an putok sa aksyon - naeenot o kaya nahuhudyan
(itututok sa kalaban an badil sabay gasod BANG - BANG dapat

tumumba an daog o kaya magbongog bongogan sana)

Maogma, eksayting an karawat - taraguan, baradilan
Sieno por siento minatapos sa pirikonan
Pag napikon - nagiging "true to life" na garapoan

KURON KURON, KURUKAWALI, AYAM AYAM
ORIG ORIG, karabasang asul ibang klase
Daing ibang original na kagibo kaini
Bolo, Putsan Bay-bay sa Banwang Tiwi!

Pobreng aki kun dai napaseguro
Pagkawat sa mga orig orig asin ayam ayam,
Nabubu'tok pagnahulog nagsusuruwayan
Goodbye- adios makolor na kawatan.

Aw di magbakal giraray

(kawat mi an baradilan/taraguan kan mga tugang ko gamit

an badil badil - an siste pirming may madaya sa karawat,

ta kun habong magtumba maski paraas ka nang gasud na
BANG BANG dai nagagadan an kalaban-gari may anting!)</i)

Buhay Facebook

Part I

Sa internet shop:

An soltero sa daraga naghapot
"Magayun na Miss, igwa kang feysbuk?"
An simbag "siempre man, siempre igwa"
"Ano pwede daw, iadd taka?"

An Daraga sa soltero nagtaram
"Uki. Halat ka, ano man an
Buwa mo - ika baga "in a relationship"" na
Dipisil iyan pag arog ka kaan
Masupog, kaklase ko pati si Ann"

An kolokoy siempre nagpasikat
Binagohan an status: SINGLE
"Hilinga daw single na baga
Haluyon na kami nagbreyk na"

Hinapot ni daraga
"Nata man kasuarin pa?
Subago diyan an nabasa ko
"in a relatioship" ka pa sana."

"Nya nem ten minutes ago pa ito
Nagbreyk kami status ko hilinga
Dai na kami totoo, maniwala ka
Elementary pa kaya talagang krasss taka na
(yududuoooooy)

Namula si nene naniwala
Sa feysbuk nagpoon, naigka inlove-an
In a relationship ni kolokoy binalik
Naka jakpat nag-ngirit ngirit
(nakaduwa)

Sa Harong : Tugang sa Tugang-Magurang

Dali dali diyan ta ako na man
Maghapon ka na daing pakinabang
Mainiton na computer masolo an
Ako na man magfeysbuk lamang

( gari bagang kun siya an magfeysbuk dai)
masolo an computer

Halat nguna basta ka sana
Maharvest ako oras na kan laya
Pag nakalihis sayang kan benta
Sa farmville kita dakul an dilensiya

Ako daw nguna patukawa diyan
Tsek ko feysbuk madali sana
Hilingon ko si bebe ko kun onlayn na
Pagdai ko matstsek ito mabubua

Asusss dakulon na nagcomment sako
Retrato ko sa cellphone wow popularun
Huni su kaklase ko kan kinder ugmahon
Pwede daa magrab saiyang sarayon

Halat nguna may gwapo digdi
Garo baga si Piolo an mga mata kaini
Inadd niya ako iadd ko man siempre
An status ugaring "it's complicated" hade?.

Aha!
Ikang paroton ka nasusog taka nanggad!
Sa feysbuk haloy taka nang pighahanap!
Ngunyan ako mabalos dai ka ngani mahidap!
Sa mga panloloko mo, makakabalos ako!

(hinanting, may atraso - salamat sa feysbuk hehe)

Ay tolo na palan an aki ni prima
Uning saro pandok Americana
An matua nata nagitom itom baga
Ining nguhod ugaring ay gari local na sana

Ahahay! Kaya palan nagparapngutang!
NagBoracay nag Disney asin nagsakay sakay
Susku kung ngumirit luwas an halunan
Sa ngunyan sigurado ini nakapamayungkuan

Ay hoooooo nagbrown out pano na ako?
Mga tanom ko sa farmville maruluyos ito
Dali dalian mag apud sa ALECO
Dapat bumalik sayang kan tanom ko

Feysbuk an sabi mo, aki ko?
Bayadan ta sabay sa tuition mo?
Maski mangutang - basta sa pageskwela
Project mong feysbuk padarahan taka.

Hilinga daw sa profile kun may agom na
Ay! Mas difisil an, "its complicated daa"
Huni man single pero may mga aki na
Huning saro dai mahiling kun bako mo friend

Si madi, si padi, mga payentes asin kaiwal
Sinda gabos mahanap mo sa feysbuk
Kamo ano an saindong eksperyens?
Sa feysbuk maogma, mamondo asin eksayting.

Part II

Mari giraray maghururon kita

Sa computer sa facebook magpalista
Dali dali ngani makaabot ka

Mga istoryang makolor maogma

Ano baya an kasibutan mo diyan?
Dai na napupu'kit sa pagbangbang
An mata mo baga maitom na
Hala dali dali magfacebook nguna

"Ata baya matanga na mari na
Sige mo pa an ngarakngak, pundo na
Ilaw palsukon nakakasuriaw,
An ribok mo hara'ha gari kang bua

Aysus si classmate, mapabunyag palan
Sa aki niya dakul, pira pansiyam?
An sabi ako mamadrina ngunyan
Alagad pa'no ini dai ako makaduman?

Sa facebook daa hilingon na sana
Su retrato paheling ki madrina
Pero sa totoo sa bunyag kairiba
Virtual na bunyag an boot baga

Aber ta helingon kun guminayon
Sakong amiga na nagglutathione
Ini binakal sa facebook nagshopping
Sus iyo man giraray gari uring

Hay siisay daw ta daing retrato
Tibaad makanos o kaya multo
Dai ko iadd tibaad pastidyo
Bahala na man kun siya kabisto

Ining facebook nata nakakaadik

Maski may gibo bibutsanan hade
Masirip kun may numbero ngaya pira?
Ay, may comment, maheling daw nguna

Oi baya ano na ngani saen ka?
Sa ibong na dahon yaon ka na
Ano pigsusunudan mo ako?
Huni digdi ano ika stalker ko?

Ata pundoha na an farmville na an
Pabakala na iyan na uma mo
Sa pitong bulan mong pagtanomtanom
Ano man an saimong naisubong?

Aysus, dai taka na daw helingon
Dai lamang maglike maski gumirong
Tibaad habo nang makiusipon
Nauyam na sa katag ko nalibong

Ining facebook satuyang dibersiyon
Nakakalinga maogmang hururron
Alagad dai kangana sa facebook
Baad kita maging facebook oripon

May facebook ka?
Magcomment ka, hehehe

Op kors :-)

Sunday, October 3, 2010

Si Isabel

Ako si Isabel. Grade 3. Alas otso na kan aga ako napagmata pa sana. Pighanap ko si May alagad dai ko maheling. Sa higod tibaad nanighid. Dakulon na ragpa kan nakaaging makusogon na bagyo. Marhay an magbagyo. Daing eskwela, masiramon magturogturog.

Mahamoton an sinapna ni Manay. Ah, may manok na ninatukan. Seguro hale ini duman sa nagkaparala kan bagyo. Msiramon talaga basta may bagyo. Daing eskwela, may masiram na isira. Pero dakulon an kalat. Asus, nagkadurumog pati su mga gamit ko sa eskwela. Pano na ini? Tibaad ako madagitan kan maestra? Bata maisogon ito.

Tama, yaon si May sa higod. Haysus, nagturumba su mga batag. Su abokado dai na mapakinabangan su mga bunga. Ano man daw ini? Gari bako na ining uruintrimis?

Enot Na Aldaw

Ini an enot na aldaw kan blogspot na ini.

Igwang naenot ka ugaring dai na maaccess...