LANGKA PA GIRARAY

(eroticisimong rawitdawit ni Taga Tiwi Albay)


Nagkalatkalat na garing pigsisigmit
Dangan linamos an sadiri
Sa hi'bog kan kadikloman

Halawig na binilog an plano
May kakambal na kurabkutab
Ugaring dai kayang sayumahan an sadiri
Daing kusug alagad pig-gugulu-guluhan

Ilinadawan an senyal sa isip
Tinoom
Magpoon sa arimpuro
Pababa
Hanggang pamitsan

Dangan kinarkulo nganing dai magsa'bit
Tamang tama sana nanggad
Bako man na mahalnason
Dumog dumog alagad kayang sakaton
 Mas pang uminorog, ginanahan
Kan maparong an hamot na nagkukurit nagsasablay

Kinapkap
Nakua an kalamnan
Dinuonan
Hinuruhapros an senyal
Malumoy, mayumhok, bilog
Tamang tama sana an du’on
An panguntiwar na dai mapilsi’
Ta an maharaphap na lawog
Pwedeng makatiunay

Hasta kina'ganan na pwersa
Du’on alagad luway luway
Sa diklom na daing maaninag
Solamenteng minutero kan orasan sa takyag
Nagdidikta nagdadara kan suanoy na ritmo
Sige na sige na sige na

Danggan nangyari
Dali daling natakdag
An puro kan halayhayan narumpag
Sarong kikilat na liwanag
May boses na kuminurit sa kamata'ngan
"May tawo! May naghaha'bas kan hinog na langka sa natad!”

Buhay Na An Makina

Apat lima Anom Pito
Sampulo o sarongdosenang  bitis
Na tigduduwang padis
Biburukos bibaraluknis

Iibuburubaranday
Saka itatarayytay
Sarong bitis nasa alpog
An saro nakaantabay

Mapoon na an kaogmahan
An lambang saro magkukurahaw
Nagkiki'ki' na sarabaysabay
Ralaas laas an boses palabaw

Mapoon nang magandar
"Buhay na an makina"


- Junio 2, 2011

Na Baktin Ini

Ano nang burubaktot mo an?
Gari nang kamoteng binaklasan
Sa gabat nagkukuadkuad
Guruyod na an bitis mapapadad
Sa kadakulan kan burubitbit
Talinga na sana an daing sa'bit
Sanggatus na dupang kadimalasan
Maski tumamling pasibog daing pakinabang
Sige na ngani pag-olmong na
Ngani an grasya masalod mapasaimo man
Ta nata saen ka kan nagsarabwagan?
Kaining mahiwas na isip asin kagayunan
Uya pa si apo' mo igwang pabalon
Sinalop na utang buda pabotog na osipon

Kapu'ngawan

Napagmuraw muraw
sa tanog kan sarong mensahe
gikan sa ginatos na ribong dupang
rayo' sa daghan
dai na naubatan
ta nalamos sa diklum
tuminaghoy  nin makusugon
nganing daogon an paghanap kan
mayumhok na hapin sa bitis
binalong alingon sa paagi
kan harararumon na paghangos
sabay kan duwang nagpaumbasan
na pagturo kan luha
dangan
hinanap kan madampog na mga mata
an pinaghalean kan mensahe
alas onse y medya an banggui --

Yesterday, Today & Tomorrow

Unlucky Day

I stepped upon a thorny rose
It pricked my foot and shrunk my nose
My mind resigned and called a truce
I sat and paused to drown in booze

Love Quote for Valentines

Halikan mo ako

nang ubod ng tamis

Nang ang mga langgam

Matunaw sa inggit

Yakapin mo ako

Na ubod ng higpit

Bumagyong malakas

Sa yakap mamilipit

Iduyan mo ako

Sa iyong kandungan

Pintig ng ‘yong puso

Awit ni Paraluman

Isayaw mo ako

Na parang ‘sang trumpo

Umikot magdamag

Hanggang sa mahilo

Awitan mo ako

Na parang ‘sang pipit

Pukawan ang diwa

Pawiin ang sakit

I MISS THE MOON

I MISS THE MOON
THE MOON MISSES ME

wara an bulan
siniba kan dragon
sabi kan mga gurang


sabi kan mga aki
nagpahingalo nguna
napagal sa maghapon

sabi ni kuya kim
sa kabikolan
" maulap ang kalangitan"

ini an sabi ko man
baad nagtatago?
maluwas na sana an

Nanguno' Kuno' Na

Ano na an pano' pano'

Isog isog ngani Tiyo'

Pakarhaya na an kambyo

Mag-smile man nguna derecho


  

Pasublia Kan Balukag Mo

Uyagwak! Uyagwak!
Bayong sa kaba'san
Batad sa mainit
Lugom sa mauran
Anong birtud baga
Inda dai aram

"Pasubli man nguna"
Puti mong balukag
Maski anong init
Maski anong uran
Daing siribugan
Maski anong rarom
Uya sa atubang

Ikurit Mo

ano daw naman kung ikurit mo?
an mga kolor na de numero
sa pagtangad ko maheling liwat
ining budlangaw, hidaw ko hanap

aldaw nagtago dai makua
dalan nasarhan puro tiunay
oh - sa kurit mo tanos an dalan
ining budlangaw an paalawan

Kagayonan Sa Uran

an uran
may dara darang kagayonan
uya an mga dahon na tomtom
sa sarong semanang kusog kan bagrat

Sa Sirangan

An milagro sa sirangan
Sa pagmuklat karangahan
Ano ining kagayonan
Sa tubig panalmingan

Nagpahingalo an dagat
Kinutay an mga lambat
Tuninong na daing sukat
Sa baybayon an paubat

(Nagpaheling man sa guiraray an aldaw...)

Dios Marhay Na Bangui

Dios Marhay na Banggui!

Mantang saro sarong
pigtatamungan ki diklom
an mga awot

Mamamatean 
an lipot kan hoyop hoyop
na minasaro sa mga yamog

Trankilo - 
an mga manok
nagkapagturugdon na
sa saindang mga tatagan

Dai ka na masusuriaw 
nakasulnop na an aldaw
asin ta ini mapapara 

Mga aking paragal pagal
dai na mailakad an mga bitis
mapupulot na an mga mata

Sa oras na ini
pighihidaw an pagiromdom
kan senyal kan pagpoon
kan pagpahingalo asin pasalamat

An bagting kan kampana
sa alas sais
asin an sarong halipot na pangadiye
para sa sarong matuninong
na banggi...

Dios magbalos 
sa sarong aldaw
na naman na natapos!

Marhay Na Aga

Marhay na aga!

Mantang luway luway
na nagkakanap
ang liwanag
sa mga balagon

May tawo na
nagkakanap kanap man
ngani mailaog sa lente
an kaagahon na ini.

Sarong milagro
an maheling 
sa oroaldaw 
an arog kaining 
kagayuonan.

Pasalamat
asin pagomaw
sa mga biyaya 

Salamat sa Diyos!

An Sakong Payag

Malipot Lipot Sa Kaba'san
aga na magbangon
isulot an pandong
magjacket magkulbong
iwas sa si'pon

dai paglingawan
tabak sa habayan
may halas sa dalan
baad mati'makan

magkape ka nguna
ba'go pa maglusad
sa Dyos pasalamat
asin ikuriyat


MARHAY NA MAURANON
ASIN MALIPOT NA AGA
SA GABOS

Paskong Mauran uran sa Payag

Pakatapos kan dai mapandong na uran
An mga makusog na bulos kan tubig
Naheling ko man sa guiraray
An gayon kan kalangitan
MARHAY NA ULTIMONG AGA
KAN TAON!

Saen Kamo Nagpasko - Sa Manila?

Saen Kamo Nagholiday - Sa Manila?

by Taga Tiwi Albay on Wednesday, December 29, 2010 at 9:50pm

Nata daw ta may Eksodus  an mga tawo basta mapasko asin ma New Year?    Maski anong lunadan paranu'an.  Mag eroplano mag aircon bus o ordinaryong lunadan.  Talagang dagsa an tawo.  Gabos an ma'wot makatungtong sa Manila - duman mapasko o ma New Year.    Ano man nanggad na penomenon ini?  Nata ta an tawo pasiriring sa ciudad mantang sa ciudad labi labi ka sibot lalo na an trapiko.    

Ah, maski anong sabihon makaogmang pagmasid masidan an mga familia na puro pasiring sa Manila an ma'wot duman makapagholidays. Iribahan an gabos mas maogma.  Maski nagsuru'suan payt sana.   Makangirhat ugaring an mga aki ni ipigtutuon sa bintana kan bus nagkakabarakingking lalo na kun saradit pa.   Mantang naheheling ko an sibot sibot na kamugtakan sa bus terminal  narumduman ko su primero kong pakatungtong sa Manila.  Maga poco mas y menos sies anyos pa sana ako.

Hale sa Tiwi odto kaming  naglunad  sa dakulaon na awto pasiring sa istasyon kan tren.  Naaraman kong  Camalig palan ito kan nagiristorya su mga kairiba mi bago magbaraba'an  sa bus na kolor  itom.  Dai pa ako kaito tatao magbasa kaya kulang sa detalye ini. .

Sa istasyon ka tren an kairiba ko si Madires, asin su duwa kong nguhod (pito kami pero tolo pa sana kan panahon na ito). Si padires nawalat.  May kairiba man akong apat na pinsan buda su ina man ninda na tugang ni Ma.  Arayyyy.. makulog su payo kong nakatangko kan ako ituon sa bintana kan tren.  Pigtuturuon an mga aki sa bintana bakong bagang sa pintuan pipaaragi ngani tultol - kun medyo dakula na - sus na pasakit!  Nya kun nahuhungkang!   May sarong aki naheling kong itinuon payo an enot na huminugpa sa laog kan tren,   HUnaon mong makalambitay sa bintana ta ituturol ka man sana - bahala ka na sa paglaog.  Paborokod pati an mga tawo paerenotan sa tukawan.  

An siste - nawaltak  su saro kong sapatos na ba'gong bakaon na may duwang pulgada pa an kadakulaan sa bitis bilang abang nganing magamit pang pirang taon segun ki madires (matalino talaga si madires sa barakalan - lubos ako).  Nasibot su Tiyuon ko ta makakaabot daa ako sa Manila na daing saibong na sapatos.  Bakong mahalaga sako kan panahon na ito an sapatos ta sa kulog kan payo na nakatandol an sakong primera menteng gustong paghaya'an.  Alagad pinugulan ko ta tibaad ako iwalat.  An sakong tulak pati nagkakala'kaga na sa gutom.  Poon alas dies kami sa Tiwi ki halat kan awtong itom na lulunadann pasiring sa Camalig - ika aki matagal ka kaan?  Pero tagal pa siempre ta baad madagitan dai makaiba pa Manila. 

Asin ta nag tototot nang halabaon an tren,  Aa sabi ni Ma "taod taod na an karakanan ta tibaad pag matanga magkagurutom bata halawing an biyahe".  Ay - Dios miong pagtios makapaManila sana!  Narumduman ko an patanid kan garing kunduktor - "sadahi sana an saindong bintana ta may udo' na ipigagapo sa tren".  Dali dali kong sinadahan mantang ako nagtatanaw kan mapu'ngaw alagad makolor na pananguron sa bintana.  Sige an purupondo.  May nagtindang tubig, maluto, kape, bunay maski ano kada istasyon magpapagmata ka sa ribok kan mga nagtatarangro' na kakanon.

Napagmata ako,  maliwanag na - iyo daa ito an Tutuban.  Haisst Manila na!  Matawo.  May nagiiwal na duwang bayi.  An sabi ni Madires " hilinga an nguhod mong duwa ta bantayan ko su mga dara dara ta.  Dai pagbayai ta mawara an saen kita kaan mahanap".  Nagkapirang kahon na an laog batag, kamote, mga gulayon buda siempre su mga pasalubong na ibos, latik...

Nakaabot man giraray sa harong kan Tiyuon mi sa Manila.  Pwerte may telebisyon.  Itom buda puti an tawo.  An naromduman ko - patalstals kan Coca Cola si Nora Aunor - an kanta "it's the real thing"....

Duman ko naikonek sa giraray kun nata an mga tawo muyang magpasko sa Manila.  May mga tinalubuan na bado hale sa mga pinsan sa tiyaon.  May mga gading na hinaraboan na kan mga aki sa Manila urugmahon na man kami.  Paerenotan pagsalo.    Dai ugaring ako nakakaiba sa mga ralakwan ta ako an nagbabantay kan tugang kong sadit pa.  Ay - paraaling baya ta matua.  Narumduman kong nagparetrato sa Luneta, sa Manila Zoo buda sa Dapitan,  Sa edad kong sais anyos dai ko pa aram kun nata ta dagsa an mga tawo sa mga lugar na ito.  Dai ako makakahuron sa mga pinsan sa tiyaon ta mga tagalog pipira pa sana an aram kong tagalog arog kan :  "di pa po ako kumakain.  nagugutom na po"... iyan pa sana an tagalog ko. 

Kamo ano an eksperiensiya kan primerong paManila?  Siguradong maogma lalo na kun Disyembre...

Alagad kun kamo tabi mga magurang dai na ipagturol an mga aki sa bintana ta baad mahultok.....

Buda mas marhay gayud atab ataban an paManila ngani dai makasabay sa suru'suan.  Iyo man sana.

Krismas Kan Sakong Mga Ataman

Pasko kan sakong mga ataman
Hababawon sanang kaogmahan
Kantidad  sana sarong toblerone
Helinga na daw ta ngururison


Kamo ano an halaga kan pasko saindo?

An Pasko Sa Mga Aki

Nagkapirang aldaw na sana
Pirang turog an pagiromdom
Aldaw na kan mga aki

An nagpaenot digdi
Si Kristo kan ipinangaki
Saiyang boses enot nadangog
Sa abang sabsaban naghibi

Mga aki saindo an pasko
May mga ba'gong bado
May mahamot na mansanas
May mga kwarta
May kaogmahan sa plaza

Kamong bako nang mga aki
Ano na an saindong pasko?

Maganang Pasko

An satong kakanon
Pwedeng bakalon
An gana pagkakan
Dai nin tindahan